Foro Polítiko pa informashon na empresario

Kralendijk – Na 2015 Kámara di Komèrsio (KvK) a organisá e promé Foro Polítiko aki na Boneiru pa asina sòru pa nos empresarionan tin mas informashon posibel kiko kada partido su vishon ta riba ekonomia. E idea tabata ku otro organisashonnan lo a tuma esaki over. E aña aki sinembargo Kámara di Komèrsio (KvK) a haña diferente pregunta dikon no ta organisá un foro atrobe. Den e kuadro ei nos a kambia nos programa kompletu pa duna oido na nesesidat di nos empresarionan i alabes teniendo kuenta ku BONHATA tambe tabatin e mésun idea pa organisá un evento similar. Asina KvK huntu ku BONHATA a uni forsa pa organisá e foro aki.

Di e manera ei e FORO POLÍTIKO di dia 7 di mart awor a bira realidat. Tur empresario ku ta inskribí na Kámara di Komèrsio por partisipá. Lugánan ta limitá. Pa partisipá mester registrá via e imeil ku nos a manda siman pasá i ayera na tur empresario. Menshoná bo empresa i nòmber di e persona ku lo partisipá. Tur partido i lista ku ta den kontienda elektoral a konfirmá nan presensia, asina ta ku nos por ta sigur ku lo tin informashon kompleto di nan tur.

E topiko sentral ta ekonomia, inovashon i futuro di nos ekonomia. Nos ta spera di mira hopi empresario bin tuma informashon i tambe hasi pregunta. E foro aki ta konta ku 2 moderador hopi konosí kendenan ta : Nicole Maduro (di e programa Mòru Bon Dia) i Aimed Ayubi (di Live99 i Breaking News). Keda pendiente, pasobra nos ta bai habri un liña di whattsapp tambe pa pueblo ku no ta presente tambe por hasi nan pregunta kòrtiku.

Si tin kualke pregunta manda un imeil na bis@kvkbonaire.comòf yama 7175595. Kámara di Komèrsio huntu ku BONHATA ta spera ku di e forma aki nan a aportá na sòru pa tur nos empresarionan ta bon informá i asina por sigi karga ekonomia di Bonaire.

Nos kier invitá tur EMPRESARIO pa registrá i partisipá!!

Languages »